کیسا ہو گا فٹبال کا مستقبل؟
یہ کہانی ناں تو کسی نجومی یا جوتشی کی ہے اور نہ ہی کسی دست شناس، فال نکالنے والے، جادوگر، عامل یا سنیاسی بابا کی ۔۔۔۔۔۔۔۔۔۔ یہ کہانی ہے الثمامہ سٹیڈیم کی کہ جس کو بنانے والوں کا دعویٰ ہے کہ اگر کوئی یہ دیکھنا چاہتا ہے کہ مستقبل کے فٹبال میچز اور فٹبال سٹیڈیمز کیسے ہوں گے تو اسے نہ تو خود حساب لگانے کی ضرورت ہے اور نہ ہی کسی عامل سے رابطہ کرنے کی ضرورت۔۔۔۔۔۔ بس وہ سیدھا الثمامہ سٹیڈیم آ جائے اور جان لے فٹبال کے کھیل کا مستقبل۔۔۔۔۔۔!
فیفا عالمی کپ قطر 2022ء کی تیاریاں اب تقریباً مکمل ہو چکی ہیں۔ اہلِ قطر نے اپنے عالمی کپ کے تمام میزبان سٹیڈیمز کی تعمیرِ نو اور تزئین و آرائش مکمل کر لی ہے۔ تقریباً ہر سٹیڈیم کے اردگرد کھلاڑیوں، شائقین اور سیاحوں کے لئے انگنت دیگر تعمیرات و سہولیات کا اہتمام بھی کیا ہے۔ اپنے شہروں کو مزید خوبصورت بنایا ہے اور ہر تعمیر و آرائش میں اپنے ملک کے ثقافتی رنگوں کو شامل کرنا ہرگز نہیں بھولے۔
بعینہٖ الثمامہ سٹیڈیم کا بھی تعمیرِ نو اور زیبائش کے بعد 22 اکتوبر 2021ء کو انچاسویں امیر کپ کے فائنل کی میزبانی کے موقع پر افتتاح ہو چکا ہے کیونکہ یہ اہلِ قطر کا پسندیدہ ترین میچ تھا چنانچہ مقامی ثقافت کے رنگوں میں رنگے ہوئے جدید اور دل نشین سٹیڈیم کے افتتاح کا اس سے بہترین موقع اور کوئی ہو ہی نہیں سکتا تھا۔ قطر کے دارالحکومت دوحہ کے جنوب میں صرف 12 کلو میٹر کی دوری پر واقع یہ سٹیڈیم فیفا عالمی کپ 2022ء کے ایک کوارٹر فائنل سمیت متعدد میچز کی میزبانی کرے گا۔
اہلِ قطر کا دعویٰ ہے کہ یہ سٹیڈیم فٹبال کے کھیل کے نئے دور کے آغاز پر منتج ہو گا کیونکہ یہ ہر لحاظ سے بہترین، مکمل، زبردست اور قطعی مسحور کن شاہکار ہے۔ قطر کی جانب سے فیفا عالمی کپ 2022ء کی میزبانی کیلئے تیار کئے گئے دیگر تمام سٹیڈیمز کے برعکس یہ سٹیڈیم صرف فٹبال مقابلوں کے لئے نہیں بلکہ ان کے ساتھ ساتھ بطورِ خاص عرب تہذیب و ثقافت اور روایات کی عکاسی کیلئے بھی سجایا سنوارا گیا ہے۔
سٹیڈیم کی ابھری ہوئی گول شکل ”القحفیہ” کو ظاہر کرتی ہے جو کہ ہاتھ یا مشین سے بُنی ہوئی ایک روایتی ٹوپی ہے جسے بالخصوص قطر اور بالعموم پورے مشرقِ وسطیٰ کے مرد اور بچے بڑے ذوق و شوق سے پہنتے ہیں۔ یہ ٹوپی عرب خاندانوں اور ان کی ثقافت کا ایک نہایت محبوب جزو ہے جو کہ ان کے وقار اور آزادی کے استعارے کی سی حیثیت رکھتا ہے۔ چونکہ یہ ٹوپی بطورِ خاص قطر کے بچوں اور نوجوانوں میں بے حد مقبول ہے چنانچہ آپ اسے قطری نوجوانوں کا استعارہ بھی کہہ سکتے ہیں۔ الثمامہ سٹیڈیم کو قطری نوجوانوں سے مشابہ بنانا درحقیقت کھیلوں کے عالمی افق پر قطر کے ایک بڑے سٹیک ہولڈر کے طور پر اُبھر کر سامنے آنے کا استعارہ ہے۔
یہ عظیم الشان اور ناقابلِ فراموش سٹیڈیم لہلہاتے سرسبز و شاداب ماحول کے بیچوں بیچ ایستادہ ہے۔ چنانچہ یہاں آنے والے اپنی آںکھوں کو اس ہریالی کی ٹھنڈک سے مزید روشن کر سکتے ہیں اور اپنے پھیپھڑوں میں شفاف ہوا کا ذخیرہ کر سکتے ہیں۔ سٹیڈیم ہی کو نہیں بلکہ اس کے قرب و جوار کو بھی بے حد خوبصورت بنا دیا گیا ہے۔ یہاں بچوں اور بڑوں کے کھیلنے اور آرام کرنے کیلئے بھی متعدد سہولیات کا اہتمام کیا گیا ہے۔ یہ سارے بندوبست صرف الثمامہ سٹیڈیم اور اس کے اردگرد کے علاقوں کو مزید خوبصورت بنانے کیلئے ہی نہیں بلکہ مقامی آبادیوں کی زندگیوں اور مستقبل کو مزید بہتر بنانے کیلئے بھی کئے گئے ہیں۔
اس وقت الثمامہ سٹیڈیم میں 40 ہزار شائقین کے بیٹھنے کی گنجائش ہے مگر فیفا عالمی کپ کے اختتام کے بعد اس کو کم کر کے 20 ہزار کر دیا جائے گا اور 20 ہزار قابلِ انتقال نشستیں ترقی پذیر ملکوں کے فٹبال گراؤنڈز کو عطیہ کر دی جائیں گی تاکہ ان ممالک میں بھی فٹبال کا انفراسٹرکچر بہتر ہو سکے اور وہاں کے کھلاڑیوں کی صلاحیتوں کی پذیرائی کے لئے زیادہ سے زیادہ شائقین مقامی سٹیڈیمز میں آ سکیں اور کھیل سے لطف اندوز ہو سکیں۔ فیفا عالمی کپ کے بعد الثمامہ سٹیڈیم میں بچ جانے والی بقیہ 20 ہزار نشستیں فٹبال اور دیگر کھیلوں کے مواقع کی میزبانی کے لئے استعمال ہوا کریں گی۔
سٹیڈیم کے ساتھ ہی عالمی شہرت یافتہ اسپیٹر سپورٹس کلینک کی ایک شاخ بھی قائم کر دی گئی ہے تاکہ یہاں کھلاڑیوں کے ہڈیوں اور پٹھوں وغیرہ کے مسائل کا بروقت علاج ہو سکے۔ یوں فیفا عالمی کپ کے دوران اور اس کے بعد یہاں اپنے فن کا مظاہرہ کرنے والے کھلاڑیوں کو اس بات کا اطمینان رہے گا کہ کسی بھی ممکنہ تکلیف کی صورت میں ان کا بروقت علاج ہو سکے گا اور اس کے لئے انھیں کہیں دور نہیں جانا پڑے گا۔
الثمامہ سٹیڈیم کی ایک اور منفرد بات یہ ہے کہ فیفا عالمی کپ کے بعد اس کا وہ بالائی حصہ کہ جہاں سے نشستیں نکال کر دیگر ممالک کو عطیہ کی جائیں گی، ایک چھوٹے ہوٹل میں بدل دیا جائے گا۔ یوں یہاں آنے والے افراد فٹبال میچز کا نظارہ بھی کر سکیں گے، زبان کے چٹخارے بھی لے سکیں گے اور یہیں قیام بھی کر سکیں گے۔ دریں اثناء، سٹیڈیم کے ساتھ ہی جدید اور وسیع خریداری کے مراکز بھی قائم کر دیئے گئے ہیں تاکہ دنیا بھر سے آنے والے شائقینِ فٹبال واپس جاتے ہوئے قطری سوغاتیں اپنے ساتھ لے جانا نہ بھولیں۔
عالمی کپ کیلئے اہلِ قطر کے انتظامات کا سلسلہ یہیں ختم نہیں ہوتا کیونکہ وہ الثمامہ سٹیڈیم کے قریب جم، کھلاڑیوں کے لئے پریکٹس ایریاز اور شائقین کیلئے تفریحی مقامات اور سیرگاہیں بھی تیزی سے تعمیر کر رہے ہیں۔ قطر والے نہیں چاہتے کہ اپنے ملکوں میں واپس جانے کے بعد کوئی سیاح یا فٹبال کا شیدائی یہ کہنے کی جسارت کرے کہ قطر کے پاس فٹبال میچز کے سوا دکھانے کو کچھ نہیں تھا۔ وہ اپنے صحراؤں، سمندروں، تفریحی مقامات، خریداری کے مقامات، ہوٹلز اور دیگر سہولیات کی ایسی دھاک بٹھانا چاہتے ہیں کہ ان کے مہمان طبعی طور پر بھلے قطر چھوڑ جائیں مگر اپنے دل چنداں ساتھ نہ لے جائیں۔۔۔۔۔۔۔۔۔!
